LANKABHIMANEE: සුන්දර කිතුල්ගල

කිතුල්ගල යනු, සබරගමු පළාතේ, යටියන්තොට ප්‍රාදේශීය ලේකම් කොට්ඨාසයේ කුඩා ගමකි. එය එක් පසෙකින් නුවරඑලිය දිස්ත්‍රික්කයට මායිම් වන අතර සබරගමුව කඳු පන්ති වලින් වටවී ඇත. අවිස්සාවේල්ල - ගිනිගත්හේන මාර්ගය හෙවත් කොළඹ හැටන් A7 මාර්ගය දිවෙන්නේ කිතුල්ගල හරහාය.

කිතුල්ගල සංචාරක පාරාදීසයක් බව කිවහොත් නිවැරදිය. සංචාරකයෙකුට මෙහි පිවිසීමට හේතු ඕනෑවටත් වඩා තිබේ.


බෙලිලෙන තුලින්

බෙලිලෙන

කිතුල්ගල පිහිටි කුරුලු කැලේ හෙවත් බංඩාර කැලය නමින් හදුන්වන වනාන්තර ප්‍රදේශය තුල විවිධ ආවේනික මෙන්ම සංචාරක පක්ෂීන්ද දැකගත හැකිය. පුරා විද්‍යා වටිනාකමක් ඇති ආදි මානවයා විසූ බෙලිලෙන නම් ස්ථානය පිහිටා ඇත්තේද කිතුලගලය. අදින් අවුරුදු 25000 ක් අතීත මානවයන් මෙහි සිටි බවට ස්ථිර සාක්ෂි හමුවී ඇත. කිතුල්ගල නගරයට මායිම්ව පිහිටි මෙම "මාකන්දාව" නම් වනාන්තරයත් ඉතා සුන්දර පරිසරයකින් සමන්විතය.

දේශීය සංචාරකයන්

කිතුල්ගලට එන සංචාරකයෙකුට ඉතා පහසුවෙන් ලගා විමට හැකි සුන්දර දිය ඇල්ලකි, මන්නකැති ඇල්ල. උසින් මිටර් 110 පමණ වෙන මෙම දිය ඇල්ලට අමතරව මිටර් 25 ක හා 35 දිය ඇලි දෙකකින් සමන්විත මන්නකැති දිය ඇල්ල, ඉතා මනස්කාන්ත දිය ඇල්ලක් ලෙස හදුන්වා දිය හැකිය.

කලු වල ඇල්ල

මන්න කැති ඇල්ල

ගග අයිනේ නවාතැන්

දෙවෙනි ලෝක යුද්ධය පසුබිම් කරගනිමින් 1952 දී ප්‍රංශ ලේඛක Pierre Boulle අතින් ලියැවුණු පොතක් ඇසුරින් නිෂ්පාදනය කළ, ඇකඩමි සම්මානලාභී The Bridge on the River Kwai හෙවත් ක්වායි ගඟේ පාලම නැමැති චිත්‍රපටය තැනුවේ කිතුල්ගලය. (ඇත්තටම නම් කැළණි ගගේ පාලම) මේ සඳහා චිත්‍රපට කණ්ඩායම විසින් මෙම ස්ථානයේදී සැබෑ ලෙසම පාලමක් ගොඩ නැගූ අතර, චිත්‍රපටයේ අවසාන දර්ශනය සඳහා එය පුපුරුවා හරින ලදි. මෙම ස්ථානයේ සිහිවටන නැරඹීමටද සංචාරකයෝ මෙහි එති.

බ්‍රිජ් ඔන් ද රිවර් ක්වායි චිත්‍ර‍ටය සඳහා තැනූ පාලම. (මෙහි නෂ්ඨාවශේෂ ඇත.)

කෙසේ වෙතත් අන්තර්ජාලයේ කිතුල්ගල ලෙස නම් කර සෙවූ විට අපට දක්නට ලැබෙන්නේ මේ කිසිවක් නොව වයිටි වෝටර් රාෆ්ටින් නැමැති ක්‍රීඩාවයි. අද ඒ තරමටම කිතුල්ගලට වෝටර් රාෆ්ටින් ක්‍රීඩාව මුල් බැස තිබේ.

‘වයිට් වෝටර් රාෆ්ටින්’(White water rafting) යනු අභියෝගාත්මක ක්‍රීඩාවකි. (Adventure) ‘රාෆ්ටින්’යනු ගංඟාවක ඉහළ සිට පහලට ස්වභාවික බැස්මවල් ඔස්සේ ආරක්ෂිත මෙවලම් පැළඳ පුහුණුවලත් මඟ පෙන්වන්නන් යටතේ අභියෝගාත්මක ගමනක නිරත වීමයි. සුදු පෙන සහිත දිය මත ලිස්සා යෑම ’වයිට් වෝටර් රාෆ්ටින්’ලෙස හඳුන්වයි. සංචාරක ආකර්ශනය දිනාගත් අභියෝගාත්මක කී‍්‍රඩා අතුරින් උපරිම වින්දනයක් ලද හැකි කී‍්‍රඩාව ‘වයිට් වෝටර් රාෆ්ටින්’ලෙස හැඳින්විය හැකිය.

1970 දශකයේ අඟ භාගයේදී ඇමෙරිකාව විසින් මෙම කී‍්‍රඩාව නිර්මාණය කර ඇත. දැනට ලොව පුරා ගංඟා 374 ක් ආශි‍්‍රතව රාෆ්ටින් කී‍්‍රඩාව පවත්වනු ලැබේ. රාෆ්ටින් ඔලිම්පික් කී‍්‍රඩාවක්ද වෙයි. ලෝකය පුරා රටවල් සිය සංචාරක ආකර්ශණය පවත්වාගෙන යෑමට මෙම කී‍්‍රඩාව ප‍්‍රබලව යොදා ගන්නා අතර, මැලේසියාව සහ ඩුබායි යන රටවල් කෘතිම ගංඟා නිර්මාණය කර රාෆ්ටින් කී‍්‍රඩාව පවත්වාගෙන යයි. මෙම කී‍්‍රඩාවේ නිරත විය හැකි ලංකාවේ එකම ස්ථානය කිතුල්ගලය.

1990 දී බ්‍රිතාන්‍ය ජාතිත පීටර් ස්ටුවර්ට් මහතා විසින් විනෝදයත්, ත්‍රාසයත්, ආරක්ෂාවත් සහිතව වෝටර් රාෆ්ටින් ක්‍රීඩාව සඳහා ලොව සුදුසුම ස්ථානයක් යැයි කිතුල්ගල නිර්දේශ කර ක්‍රීඩාව හඳුන්වා දෙනු ලැබුවේය. කිතුල්ගල ඇති සුවිශේෂිත්වය නම් සෑම ගංඟා බැස්මක් (Rapid) අවසානයේදී ම ජලය නිසලව ගමන් කරණ (Flat) ස්ථානයක් පැවතීමයි. මෙම ස්ථානයේ කිලෝමීටර් පහ හමාරක් ඇතුලත රැපිඩ් හෙවත් බැස්මවල් (සුදු පෙණ වීසි වන කුඩා ඇලි) 7 ක් පවතියි.

කිතුල්ගල ‘වයිට් වෝටර් රාෆ්ටින්’කී‍්‍රඩාව දෙස් විදෙස් සංචාරක ආකර්ශණය පමණක් නොව දහස් ගණනකගේ ජීවිතද සුරක්ෂිත කරයි. මෙම ප‍්‍රදේශයේ සංචාරක හෝටල් 38 ක් ඇත. එම හෝටල් වල සේවකයන් 400 ක් පමණ රැකියා කරයි. රාෆ්ටින් සේවා සැපයීම් ආයතන 10 කි. එම ආයතනවල 200ක් පමණ පිරිසක් සේවය කරයි.

වයිට් වෝටර්

වෝටර් රාෆ්ටින් සඳහා අන්තර්ජාතික වශයෙන් පුහුණුව ලබා සහතික ලත් මගපෙන්වන්නන් (ගයිඩ් වරුන්) 500 ක් පමණ මෙම ප්‍රදේශයේ සිටින අතර, ඔවුන් නිසි ආදායමක් ලබති. තවද පැමිණෙන දේශීය හා විදේශීය සංචාරකයන් නිසා ආවේණික වෙළඳ පොළක් බිහිවී ඇත. මීට අමතරව කඳුනැගීම, ඇලි තරණය ආදී විවිධ අභියෝගාත්මක ක්‍රීඩා ද මේ ආශ්‍රිතව බිහිවී ව්‍යාප්ත වී ඇත.

ඔබ පිහිනීමට කිසිසේත්ම නොදන්නෙක් වූවද, කිතුල්ගලදී ඔබට කිසිදු අනතුරකින් හානියකින් තොරව ඔබේ කණ්ඩායම සමග බෝට්ටුවකින් රැපිඩ් 7 ක් පසුකර කිලෝමීටර් පහ හමාරක් කැළණී ගග පහළට සුදු පෙළ කැටි අතරින් යාත්‍රා කළ හැකිය. ආරක්ෂක හිස් වැසුම් හා වෙනත් ආරක්ෂිත ඇඳුම් පැළඳ සිටින ඔබ සමග වෝටර් රාෆ්ටින් උපදේශකවරු හෙවත් මග පෙන්වන්නෝ ඔබේ ආරක්ෂාවට ඔබ සමග බෝට්ටුවේ ගමන් කරනු ඇත. කිතුල්ගල වයිට් වෝටර් රාෆ්ටින් ක්‍රීඩාව හඳුන්වා දුන් දා සිට මේ දක්වා කිසිඳු හෝ ජීවිත හානියක් සිදුවී නොමැත.